ပခန်းမြေသို့ အလည်တစ်ခေါက် (သို့) ဇာတာဖွဲ့ဖို့ အရပ်ဒေသ ဒီဂရီတွေလိုရင်

ပုံမှန်အားဖြင့် မြန်မာနိုင်ငံတွင်း မွေးဖွားသူတွေရဲ့ မွေးရာဒေသရဲ့ လတ္တီကျုလောင်ဂျီကျုကို mandalayalpha နဲ့ ဇာတာပရိုဂရမ် မှာ အလွယ်တကူ ရှာလို့ ရနိုင်ပါတယ်။ အချို့သော ဇာတာရှင်တွေဟာ ဇာတာဖွဲ့ဖို့အတွက် မိမိမွေးဒေသရဲ့ လတ္တီကျုလောင်ဂျီကျုထည့်ရာမှာ အင်မတန် အခက်အခဲတွေ့တတ်ပါတယ်။ ဥပမာ မြန်မာနိုင်ငံက ကျေးလက်ဒေသများနဲ့ တိုင်းတစ်ပါးကဒေသတွေမှာ မွေးသူတွေဖြစ်ပါတယ်။

ပရိုဂရမ်မှာလည်း မြန်မာအတွက် ဒေသတွေကို အရန်သင့်ထည့်ရာမှာ မြို့တွေနဲ့ ရွာကြီးတွေအတွက်ပဲ ပါပါတယ်။ ကျန်ဒေသများအတွက်ကတော့ အခက်အခဲရှိပါတယ်။ ယခုအခါမှာ စင်္ကာပူမှာ မွေးဖွားသူ မြန်မာကလေးငယ်များရှိလာတာကြောင့် ထိုကလေးငယ်များအတွက် ဇာတာဖွဲ့ဖို့ အခက်ကြုံလျှက်ရှိပါတယ်။ ကျွန်တော်ကူညီလိုက်ပါတယ်ခင်ဗျ။


၁) မြန်မာနိုင်ငံတွင်း လတ္တီကျု လောင်ဂျီကျု မသိသူများအတွက် အလွယ်တူကမ္ဘာလှည့်ရှာပြီး ကြည့်နိုင်ပါတယ်။ မြန်မာနိုင်ငံရဲ့ စံတော်ချိန်ညှိနာရီကတော့ +6:30 လို့ ပရိုဂရမ်က အရံသင့်ထည့်ပြီးသာပါခင်ဗျ။
၂) မြန်မာမဟုတ်တဲ့ နိုင်ငံများအတွက် လတ္တီကျုလောင်ဂျီကျုရှာရာမှာ မြို့နာမည်ရိုက်ရှာလို့ လွယ်ပေမယ့် အဖြေဟာသိပ်တိကျလာတယ်တော့ မဟုတ်ပါဘူး။ ဘာကြောင့်လဲဆိုတော့ မြို့တည်နေရာကို ညွှန်ပြတဲ့ ပွိုင့်နဲ့ ဆေးရုံဟာ မိုင် အနည်းငယ်လောက် ကွာနေရင် အဖြေဟာ အတော်လေးပြောင်းသွားနိုင်ပါတယ်။ ဒါ့ကြောင့် အတတ်နိုင်ဆုံး မြေပုံပေါ်မှာ ခန့်မှန်းနိုင်မယ်ဆိုရင် အကျိုးများမယ်လို့ ထင်ပါတယ်။ တဖန် ဒေသ စံတော်ချိန်အတွက် မြန်မာနဲ့ ကွာချိန်ကို တွက်ပြီး ပေါင်းနှုတ်လုပ်ပေးဖို့လိုပါတယ်။

ဥပမာစင်္ကာပူဟာ မြန်မာနဲ့ ၁ နာရီခွဲကွာပါတယ်။ ကမ္ဘာ့အရှေ့ခြမ်းကို တိုးသွားတာကြောင့် ထပ်ပေါင်းပါမယ်။ ဒါ့ကြောင့် စင်္ကာပူမွေးသူတွေဟာ +8:00 နဲ့တွက်ရပါမယ်ခင်ဗျ။
+ - ရဲ့ သဘောကတော့ ဂရင်းနစ်မှသည် အရှေ့ဆီကို + နဲ့ ၁၂ နာရီတိုင်အောင် ရေတွက်လာပြီး၊ အနောက်ကိုတော့ - နဲ့ ၁၂ နာရီတိုင်အောင် ရေတွက်လာပါတယ်။ ၂၄ နာရီ ကမ္ဘာတစ်ပတ်ပေါ့ခင်ဗျ။

ကမ္ဘာကြီးကို ပတ်ကြည့်နိုင်ဖို့ ဒီမှာ ဒေါင်းပါခင်ဗျ။

http://earth.google.com/intl/en/download-earth.html

ဒေါင်းလိုက်တဲ့အခါ googleupdatesetup ဆိုတာလေးကျလာပြီး သူ့ကို run လိုက်ယုံပါပဲခင်ဗျ။

  • ပခန်းမြေဆီ အလည်တစ်ခေါက်
စာပေအရတော့ ပခန်းကို ပုခန်းကြီးမြို့ဟောင်းလို့ သုံးပါတယ်။ ပုဂံကိုသုံးသလိုပေါ့ခင်ဗျ။ ကျွန်တော်ကတော့ စကားအရ ပခန်းဟုသာ သုံးနှုံးပါကြောင်း တင်ကြိုပြောပြပါရစေခင်ဗျာ။
အောက်ပါအတိုင်းပဲ မြန်မာနိုင်ငံဆီကိုလာပြီး ကလစ်ခေါက်ကာ ဒေသမှန်းလိုက်ပါခင်ဗျ။
မြန်မာနိုင်ငံပေါ်ဆီကို အောက်ကပုံအတိုင်း ရွှေ့လာပါတယ်ခင်ဗျ။
အောက်ကပုံအတိုင်း ဧရာဝတီ ချင်းတွင်းမြစ်ဆုံကို ရွှေ့လာလိုက်ပါတယ်ခင်ဗျ။

အောက်ကပုံကတော့ ပခန်းရှေးဟောင်းမြို့တော်ရဲ့ ကျက်သရေဆောင် စည်သူရှင်စေတီတော်ကို ကောင်းကင်က ဖူးမြင်ရပုံဖြစ်ပါတယ်။ ၁၁ ရာစုခန့်က အလောင်းစည်သူမင်းကြီး တည်ထားကိုးကွယ်ခဲ့တာဖြစ်ပါတယ်။ အမွှေးတိုင်ပူဇော်ခွင့် မပေးထားပေမယ့် သရက္ခာန်အစစ်လက်လေးသစ်ဆိုသလို ဂန္ဓကုဋီတစ်တိုက်လုံး ဖူးမြှော်မ၀တဲ့ မွေးနံ့နဲ့ လွှမ်းခြုံစေတဲ့ သရက္ခာန်ရုပ်ပွားတော်မြတ်ကိန်းဝပ်စံပါယ်ရာ စေတီတော်ဖြစ်ပါတယ်။ နှစ်စဉ် အတာသင်္ကြန်တွင်းမှာ ဗုဒ္ဓပူဇနိယပွဲတော် ကျင်းပပါတယ်။
ဒီအောက်က ဒေသကတော့ စကားတတ်ပါတယ်ဆိုတဲ့ ပခန်းသားနဲ့ ချည်ပါသား ၀တ္တုတွေထဲက ပခန်းသားများ မွေးထုတ်ပေးရာ ပခန်းကြီး ပခန်းငယ် ထဲက ပခန်းကြီးရဲ့ ပုံပဲဖြစ်ပါတယ်။ နတ်လောကက အရက်သောက်ရင်း နာမည်ကျော် ရွှေခန်းမြို့က ကတဲ့ ပခန်းကိုကြီးကျော်ရဲ့ အသည်းစွဲ ထန်းတောများ တည်ရာဒေသဆိုလည်းမမှားပါဘူး။

ပခန်းကျောင်းကန် ပုဂံဘုရားရယ်လို့ ဆိုရိုးတစ်ခုရှိပါတယ်။ ပခန်းကြီးမှာ ရှေးယခင်က ဘုန်းကြီးကျောင်း ၂၅ ကျောင်းခန့် ရေတွက်လို့ ရခဲ့ပါတယ်။ ယခုအခါမှာတောင် ၅ ကျောင်း ရှိနေပါသေးတယ်။ ပခန်းကိုရောက်ရင် မဖြစ်မနေ သွားလည်သင့်တဲ့ နေရာက ပခန်းကျောင်းတော်ကြီးဆီဖြစ်ပါတယ်။ မန္တလေးက ရွှေကျောင်းလို ပန်းနွယ်ပန်းခက် မပြီသတော့သော်လည်း ကြီးမားလှတဲ့ တိုင်လုံးကြီးတွေက အင်းဝခေတ်ဆီကို ညွှန်ပြနေသလိုပါပဲ။ ၀ါတွင်းကာလတွေမှာ ဥပုသ်သည်တွေအတွက် အရိပ်မိုးပေးရာ ကျောင်းတော်ကြီးဖြစ်သလို ကျွန်တော်တို့ငယ်စဉ်က ပြေးလွှားဆော့ကစားခဲ့ရာ ကျောင်းတော်ကြီးလည်းဖြစ်ပါတယ်။

ဒီပုံထဲက အ၀ါရောင် အ၀န်းက ပခန်းမြို့ရိုးပုံပါ။ ပခန်းကိုကြီးကျော်ရဲ့ အသည်းစွဲ ရှင်ဘို့မယ် နဲ့ သူ့မခမည်းတော် ပခန်းမြို့စား တရဖျားတို့ နန်းစံခဲ့ရာ မြို့တော်ရဲ့ မြို့ရိုးတွေဖြစ်ပါတယ်။ တောင်သုံးလုံးကို မြေညှိ တည်ဆောက်ထားတာမိုလို့ ခံတပ်သဖွယ် ခိုင်ခံလှပါတယ်။ ပန်းနုရောင်နဲ့ ပြထားတာကတော့ ရှေးဟောင်းသုတေသနပြတိုက်ဖြစ်ပါတယ်။ ပခန်းမြို့ဟောင်းဝန်းကျင်မှ တူးဖေါ်ရသမျှကို ပြသထားပါတယ်ခင်ဗျ။
အစိမ်းရောင် အ၀န်းကတော့ ကျွန်တော်တို့စာသင်ကျောင်းပါ။ ညီကိုမောင်နှမတွေအားလုံး ဒီကအခြေခံပညာပြီးပါတယ်။ ကျွန်တော့်မိဘနှစ်ပါးတာဝန်ထမ်းဆောင်ရာ အထကကျောင်းလည်းဖြစ်ပါတယ်ခင်ဗျာ။
အောက်ကပုံကတော့ ကျွန်တော်အမြဲတမ်းလိုလို အိမ်ကို သတိရရင် ငေးကြည့်နေကျ ကျွန်တော်တို့ရပ်ကွက်ပါ။ ကျွန်တော်တို့ အိမ်ထဲက တမာပင်ကြီးရယ် အိမ်ရှေ့မျက်နှာစာကွင်းပြင်ရယ် ထပ်ချဲ့လို့ရမယ်ဆိုရင် မြင်ရဦးမယ့် မိဘနှစ်ပါးနဲ့ ဘိုးဘွား မိသားစုတွေရယ်ပေါ့ဗျာ။ ခုချိန်မှာတော့ ကျွန်တော်ဟာ မိုင်ပေါင်းထောင်ချီဝေးတဲ့ ရေခဲပြင်ဒေသမှာ ရောက်ရှိလို့နေပါတယ်။
အထက်ပါပုံထဲက အစိမ်းရောင်ကတော့ ကျွန်တော်တို့ လိုချင်တဲ့ လတ္တီကျုနဲ့ လောင်ဂျီကျုပေါ့ခင်ဗျာ။
ဒီထက်တိကျတာတော့ ဘာရှိဦးမလဲဗျ။

နောင်တစ်ချိန်မှာ ပခန်းဒေသနဲ့ ပခန်းသားတွေအကြောင်း ဘလော့ပြုလုပ်ဖို့ စိတ်ကူးရှိပါတယ်။
ကျွန်တော်တို့ရွာကို လာလည်ပါ။ ပခန်းသားဆို တစ်ရွာလုံးသိပါတယ်။ တွေ့တဲ့အိမ် ဇွတ်ဝင်တာတည်းပါ။ ရဲစခန်းလည်းရှိပါတယ်။

ဒီပို့စ်ကတော့ စင်္ကာပူမှာ ဒီနေ့မွေးဖွားတဲ့ မိန်းကလေးတစ်ယောက်ကို အကြောင်းပြုပြီး ရွာကို လွမ်းစိတ်ပါပေါင်းရင်း ရေးတာဖြစ်ပြီး၊ အလည်ဖိတ်ခြင်းနဲ့အဆုံးသတ်ပါမယ်ခင်ဗျာ။

အမိမြေဆီကို လှမ်းမျှော်ကြည့်ရင်း အလွမ်းဖြေနိုင်ကြပါစေခင်ဗျာ။
ကိုပခန်း

No comments:

Post a comment

ဒီpostနဲ့ပတ်သတ်လို့ ပြောချင်တာရှိရင် ပြောခဲ့ဖို့ပါဗျာ။