ဟောကိန်းတစ်ခုထုတ်နိုင်ဖို့ဆိုတာ (၂)

ယခုအပိုင်းတွင် ၀ိသောတ္တရီဒသာစနစ်အရ စိတ်ပိုင်းဟောပြောပုံကို တင်ပြသွားမည်ဖြစ်ပါသည်။

မူလဇာတာအရ တနင်္လာဂြိုဟ်၏ တည်ရာ ရာသီ၊ အင်သာ၊ လိတ္တာ၊ ၀ိလိတ္တာနှင့် မွေးနေ့သိယုံမျှနှင့် ၀ိသောတ္တရီဒသာစနစ်မှ ပြဆိုသော ကာလများကိုသိနိုင်ပါသည်။ ပထမဦးစွာ တွက်ရလွယ်ရန် ယူနစ်အသေးသို့ ချဉ်းကပ်စဉ်းစားရပါမည်။

တစ်ရာသီတွင် ၃၀ အင်သာ(ဒီဂရီ) ရှိသဖြင့် ၃၀ ဖြင့်မြှောက်က အင်သာ(ဒီဂရီ) ရသည်။ ၄င်းကို မူလအင်သာဖြင့်ပေါင်းကာ (၁ အင်သာတွင် ၆၀ လိတ္တာရှိသဖြင့်) ၆၀ ဖြင့်မြှောက်သည်။ ရလာသော လိတ္တာကို မူလလိတ္တာနှင့်ပေါင်းကာ (၁ လိတ္တာတွင် ၆၀ ၀ိလိတ္တာရှိသဖြင့်) ၆၀ ဖြင့်မြှောက်သည်။ ရလာသော ၀ိလိတ္တာကို မူလ၀ိလိတ္တာနှင့်ပေါင်းက တနင်္လာတည်ရာကို ၀ိလိတ္တာဖြင့်မြင်ရပါတော့သည်။ အောက်ပါအတိုင်း excel တွင်တွက်နိုင်သည်။


ထို့နောက်တွင် နက္ခတ် ၂၇ လုံးတည်ရာကို သိရန်လိုအပ်ပြီး နက္ခတ်တစ်လုံး၏ အစနှင့်အဆုံး ၀ိလိတ္တာများကို ဖွဲ့ရန်လိုသည်။ ၄င်းအတိုင်းအတာများကို ဤပိုစ့်တွင် ဖေါ်ပြခဲ့ပြီးဖြစ်သည်။ တနင်္လာတည်ရာသည် နက္ခတ်အစနှင့်အဆုံးကြား တိုက်ဆိုင်စစ်ခြင်းဖြင့် အောက်ပါအတိုင်း အဖြေရရှိပါသည်။ excel ကို ဖေါ်ပြခြင်းမဟုတ်သဖြင့် တိုက်ဆိုင်စစ်ဆေးခြင်းကို ချန်လှပ်ခဲ့ပါသည်။ IF ဖန်ရှင်လောက်ဖြင့် အလုပ်ဖြစ်ပါသည်။


အထက်ပါပုံစံအရ တနင်္လာသည် 920524 ၀ိလိတ္တာတွင် တည်ရှိကာ ပြုဗ္ဗာသဌ် နက္ခတ်ဧရိယာ 912000 မှ 960000 ၀ိလိတ္တာ အတွင်းတွင် တည်ရှိကြောင်း အဖြေရပါသည်။ ပြုဗ္ဗာသဌ်သည် စိုးမိုးဂြိုဟ် သောကြာဖြစ်ကာ (၀ိသောတ္တရီနည်းအရ) စိုးမိုးကာလ ၂၀ နှစ်ကြာပါသည်။ ရက်အနေဖြင့် 7305 ရက် ကြာမြင့်သည်။

တနင်္လာ၏ နက္ခတ်တွင်းဝင်ရောပြီးသော အတိုင်းအတာ၊ ဖြတ်သန်းရန်ကျန်ရှိသော အတိုင်းအတာအချိုးဖြင့် တွက်ချက်လိုက်ပါက၊ တနင်္လာသည် ပြုဗ္ဗာသဌ်နက္ခတ်အဆုံးထိ ဖြတ်ကျော်ရန် ရက်ပေါင်း 6008 ရက် ကျန်ပါသေးသည်။ ၄င်းကို နှစ်လရက် ဖွဲ့သော် ၁၆ နှစ် ၅ လ ၁၄ ရက် ရရှိပါသည်။

ထိုကာလကို အနာဂတ်နှစ်ကြွင်း ၆ကြာဒသာ ၁၆ နှစ် ၅ လ ၁၄ ရက်ဟု ဖေါ်ပြလေ့ရှိပါသည်။ ထန်းဖူးဇာတာများတွင် တွေ့ရတတ်ပါသည်။ ယခုတစ်ဖန် ထိုကာလကို မည်သို့အသုံးချသွားမည်ကို ဆက်လက်ဖေါ်ပြပါမည်။


အထက်ပါဇယား၏ အဓိပ္ပါယ်မှာ မွေးနေ့ 3.1.1984 သည် ပြုဗ္ဗာသဌ်နက္ခတ် စိုးမိုးဂြိုလ် ၆ ကြာဒသာတွင်း ကျရောက်သည်။ ထို ၆ ကြာစိုးမိုးမှုကုန်ဆုံးရန် ၁၆ နှစ် ၅ လ ၁၄ ရက်ကျန်ရှိနေပါသည်။

မွေးနေ့ကို ကုန်ဆုံးရန်ကျန်ရှိရက် ၁၆ နှစ် ၅ လ ၁၄ ရက်ထပ်ပေါင်းလိုက်ပါက 17.6.2000 ကိုပြဆိုသည်။ ထို့နောက် ၀ိသောတ္တရီ၏ဒသာအစဉ်ဖြစ်သော ၁ ၂ ၃ ၈ ၅ ၀ ၄ ၉ ၆ ဟူ၍ မိမိတို့ကိုယ်ပိုင် ဂြိုဟ်သက်အရစားပါသည်။ 17.6.2100 ၌ ကိတ်ဂြိုဟ်၏ စိုးမိုးကာလ ဆုံးသွားပါသည်။ ၄င်းနောက် သောကြာ၏ စိုးမိုးကာလပေါင်း ၂၀ နှစ်ထဲမှာ နှစ်ကြွင်းဒသာ ၁၆ နှစ် ၅ လ ၁၄ ရက် ကိုနှုတ်၍ ကျန်ရှိသော ၃ နှစ် ၆ လာ ၁၆ ရက် စိုးမိုးပါသည်။

အားလုံးပေါင်းပါက ၁၂၀ နှစ်ကိုရရှိပါသည်။ အဘယ့်ကြောင့် ၁ ၂ ၃ ၈ ၅ ၀ ၄ ၉ ၆ စဉ်သနည်း အဘယ့်ကြောင့် ထိုမျှ ကာလကိုယ်စီခွဲပါသနည်းဟု သိလိုပါမူ ၀ိသောတ္တရီဒသာကို စီရင်ခဲ့သူ ဆရာသခင်အား မေးမြန်းမှသာဖြစ်နိုင်ပါမည်။ သို့တစေ ၀ိသောတ္တရီသည် နက္ခတ်ဆရာများ အများဆုံးအသုံးပြုသော စနစ်ဖြစ်သည်ဟု မှတ်သားရပါသည်။ လူ၏သက်တန်း ၁၂၀ အပေါ်အခြေခံခြင်းကြောင့် တိုက်ဆိုင်ရသည်ဟုလည်း မှတ်သားရပါသည်။

ထိုဇယားမှ သတိပြုရန်အချက်များ ပေါ်ပေါက်လာပါသည်။

ဇာတာအရ ကြီးမြတ်စေသော ဘုန်းတန်ခိုးတက်စေသော ယုဂ်တစ်ခုသည် အထက်ပါ ဇာတာအရ ဥပမာအားဖြင့် ၆ကြာနှင့်ပတ်သတ်ဖြစ်သည်ဆိုပါစို့။ မွေးစမှ ၁၆ နှစ်သားခန့်ခံစားရနိုင်ကာ ဇာတာရှင်၏အသက် ၁၁၆ နှစ်တွင်မှ အကျိုးပေးမည်ဟု ညွှန်းဆိုပါသည်။ ထို့ကြောင့် အောက်ပါအတိုင်း မှတ်ချက်ပြုနိုင်ပါသည်။

ဇာတာအရ မည်မျှကောင်းစေကာမူ ဒသာအရ ဇာတာရှင် အသက်ငယ်လွန်းချိန်နဲ့ အရွယ်လွန်ချိန်တွင် အကျိုးပေးပါက ခံစားခွင့်ရှိမည်မဟုတ်ပေ။ ရွှေထီးဆောင်းရမည့် ကံပါပါလျှက် သေခါနီးမှ ဆောင်းခွင့်ရသော ပုံပမာသည် ကံ၏ အရေးကြီးပုံကို ဖေါ်ပြသည့်အပြင် အကျိုးပေးကာလတို့ကိုလည်း သတိပြုမိစေရန် ထောက်ပြနေသကဲ့သို့ ရှိနေပါသည်။

အထက်ပါရှည်လျှားလှသော ကာလကြီးများကို သိယုံမျှဖြင့် အသုံးမ၀င်သေးပါ။ ၄င်းကို ထပ်မံခွဲစိတ်ရပါတော့သည်။ ထို့သို့ခွဲစိတ်ပုံ အဆင့် ၅ ဆင့်မျှပင် ခွဲစိတ်တတ်ကြသော်လည်း ကျွန်တော့်အနေဖြင့် ဒုတိယအဆင့်ကိုသာ ခွဲစိတ်ဟောပြ နမူနာပြုပါမည်။ ဆရာအဆူဆူက အန္တဒသာသည် အားကြီးကြောင်း ညွှန်းဆိုလျှက် ဆရာနျူမာန်၏ အဆိုအရ ဒသာသည် 20% အန္တရဒသာသည် 70% ပြတ္တန္တရသည် 5% မျှ အင်အားရှိကြောင်း မှတ်သားသိရှိရပါသည်။

အန္တရဒသာခွဲဝေပုံကို တင်ပြပေးပါဦးမည်။

၁ နွေ၏ ဒသာကာလသည် ၆ နှစ်ရှိသည်။ ၆ နှစ်ကို လဖွဲ့၊ ရက်ဖွဲ့က 2160 ရက်ရရှိပါသည်။ 365.25 ဖြင့် မြှောက်ရန်မသင့်ပါ။ အဘယ်ကြောင့်ဆိုသော် ပေါင်းနှုတ်မြှောက်စား နည်းများ ဖြိုတက်ခြင်းများသည် တစ်လလျှင် ၃၀ ဖြင့် ပရိုဂရမ်ရေးခြင်းကြောင့်ဖြစ်ပါသည်။ ထိုသို့တွက်ပါမှ ကာလတစ်ခု၏ အဆုံးသည် နောက်ကာလ၏ အစနှင့်ကိုက်မည်ဖြစ်သည်။

၁ နွေဒသာတွင် ၁ နွေအန္တရကို တွက်လိုက ၁ နွေဒကာကာလကို ၁နွေအချိုးဖြင့်မြှောက်ယုံသာရှိသည်။
၁ နွေဒသာ ၁ နွေအန္တရ= ၁ နွေကာလ 2160 ရက် x (၁နွေသက် 6 နှစ် / ဂြိုဟ်အားလုံးသက် 120 နှစ်)
                             = 108 ရက်= ၁၈ ရက် ၃ လ

၁ နွေဒသာ ၂ လာအန္တရ= ၁ နွေကာလ 2160 ရက် x (၂လုာသက် 10 နှစ် / ဂြိုဟ်အားလုံးသက် 120 နှစ်)
                              = 180 ရက်= ၆ လ

ဂြိုဟ်အားလုံးအတွက် တွက်ချက်လိုက်ပါက အောက်ပါအတိုင်း ရရှိပါမည်။



ဒသာအဟောများ

ဇာတာရှင်သည် 17.6.2000 မှ 17.6.2006 အတွင်းတွင် တနင်္ဂနွေဒသာစားသောကြောင့် အောက်ပါအကျိုးများ ဖြစ်ထွန်းခံစားရမည်။

(၁) ၉ တန့် သုဘ (ကျက်သရေ) သခင် ၁ တန့် တနု (ဇာတာရှင်ကိုယ်စားပြု အတန့်) ရပ်သော ရူပယုဂ်အရ တင့်တယ်သော ကျက်သရေရှိသော အကျိုးများခံစားရမည်။ အခြားဂြိုဟ်များ မဆက်စပ်သော 17.6.2000 မှ 5.10.2000 အတွင်းတွင် နာမည်ပွင့်ခြင်း၊ မိသားစုဝန်းကျင်တွင် ကျက်သရေမင်္ဂလာနှင့်ပြည့်စုံခြင်းများ ဖြစ်တည်မည်။

မှတ်ချက်။ ။ ထိုကာလသည် ဇာတာရှင်၏ အထက်တန်းစာပေးပွဲ အောင်စာရင်းထွက်ချိန်တွင်ကျရောက်ကာ အမှတ်ကောင်းကာ ဂုဏ်ထူးများဖြင့် ဖြင့်အောင်မြင်ခဲ့သည်။

(၂) ၂ လာမှ ၁ နွေသို့ 87.52 % ဖြင့် မိတ်အဖြစ်မြင်သော 5.10.2010 မှ 5.4.2001 အတွင်းတွင် ၁နွေနှင့် ၂လာပေါင်းသော စန္ဒာသူရိယ စက်ကိရိယာနှင့် အကျိုးပေးသော ယုဂ်တစ်မျိုးဖေါ်ဆောင်သည်။ MOTAA စနစ်အရ ဂြိုဟ်အားပြ ဂရပ်ဖ်တွင် ၂ လာ အားကြီးခြင်းကြောင့် ၂ လာ သဘောသဘာဝများ အထင်အရှားသက်ရောက်မည်။ ၂ လာသည် ၈ တန့်သခင်ဖြစ်ခြင်းကြောင့် ဥစ္စာရခြင်း အမွေရခြင်း၊ ရင်းနှီးမြုပ်နှံမှု၊ တာဝန်ယူမှုစသည့် ၈တန့် မရဏဘာဝ၏ ကောင်းကျိုးများကိုသာ ရွေးချယ်ပြဌာန်းမည်ဖြစ်သည်။ ထို့ကြောင့် စက်ရိယာနှင့်အကျိုးပေးခြင်းနှင့်အတူ (၂လာ ပင်ကိုယ်အရ) အေးချမ်းသော အကျိုးပေး (၈တန့်ကောင်းကျိုးအရ) တာဝန်ယူရခြင်း ဥစ္စာပစ္စည်းများ ရရှိခြင်းတို့ ဖြစ်ပေါ်မည်။

မှတ်ချက်။ ။ ထိုကာလတွင် ဇာတာရှင်သည် အင်ဂျင်နီယာ ဆရာဖြစ်သင်တန်းသို့ စတင်တက်ရောက်ခဲ့ရာမှ လခစားဘ၀အပြင် စာချုပ်များပါ ချုပ်ဆိုခဲ့ရသော အဖြစ်များ ခံစားရလေသည်။

(၃) ၃ င်္ဂါမှ ၁ နွေသို့ 0.61% ဖြင့် မိတ်အဖြစ် ဆက်သွယ်နေသည်။ ဆက်စပ်မှုအား နည်းပါးလှသည်။ 5.4.2001 မှ 11.8.2001 ကြား အန္တရဒသာကို ဦးစားပေးညွှန်းဆိုရမည်ဖြစ်သဖြင့် အန္တရဒသာဂြိုဟ် ၃င်္ဂါကို စစ်ရမည်။ အင်္ဂါသည် ၅ တန့် ၁၂ တန့်သခင်ဖြစ်ကာ ၁၁ တန့်ရပ်သည်။ ၅ တန့်သည် ပညာရေး ကိုညွှန်းကာ ၁၂ တန့်သည် ရပ်ဝေးကိုလည်း ဖေါ်ဆောင်သည်။ ၁၁ တန့်ရပ်ခြင်းသည် မိတ်ဆွေသဘာဝကို ဖေါ်ပြသောကြောင့် အဝေးရောက်ကာ ပညာရေးအရ မိတ်ဆွေတိုးပွားရာ ကာလဖြစ်မည်။

မှတ်ချက်။ ။ ထိုကာလတွင် ဇာတာရှင်သည် သင်တန်းသားတစ်ဦး ဖြစ်သည်နှင့်အညီ မိမိမွေးရပ်မှခွဲကာ မိတ်ဆွေသူငယ်ချင်းတိုးသော ကာလဖြစ်သည်။

(၄) ၈ဟုသည် ၁ နွေကို 0.00% ဖြင့် ရန်ပြုသည်။ 11.8.2001 မှ 5.7.2002 တွင်ဖြစ်သည်။ အား % မရှိသဖြင့် ပြင်းထန်သော ကောင်းဆိုးများမဖြစ်နိုင်ပါ။ % များပါက ၈ဟုသည် ဧကန်ပင် အပြောင်းအလဲများ ဖြစ်စေမည့်သဘောဖြစ်သည်။ ၈ ဟု မူလသဘာဝအရ အမှတ်မထင်ဖြစ်မှု အနည်းငယ်သာဖြစ်မည်။ ၁ နွေနှင့်ဆက်စပ်သော အကျိုးပေးများ ဖြစ်ပေါ်နိုင်သော်လည်း ရန်ပြသည်။

မှတ်ချက်။ ။ ထိုကာလတွင် ထူးခြားသော အဖြစ်များမပေါ်ပေါက်ခဲ့ပါ။

(၅) ၅တေးမှ ၁နွေသို့ 0.00% မိတ်အမြင်ဖြင့်ဆက်သွယ်သည်။ 5.7.2002 မှ 23.4.2003 တွင်းဖြစ်သည်။ အား % အရ မဆက်စပ်သဖြင့် အန္တရဒသာအရ ကြာသာပတေးကို စစ်ဆေးမည်ဖြစ်သည်။ လဂ်သခင်ဖြစ်ကာ ၄ တန့် အိမ်ရှင်လည်းဖြစ်သည်။ လဂ်တွင်ရပ်သည်။ ဇာတာရှင်သည် ပညာရပ်များဆည်းပူးခြင်း ပညာရေးနှင့်ပတ်သတ်ခြင်းများ ဖြစ်ပေါ်မည်။ ဒသာနှင့် အန္တရတို့ ဆက်သွယ်မှု အား % မရှိသဖြင့် ဆည်းပူးသမျှပညာတို့သည် မိမိနှင့်တိုက်ရိုက်မသက်ဆိုင်ပေ။

မှတ်ချက်။ ။ ထိုကာလတွင် ဇာတာရှင်သည် တယော မယ်ဒလင်၊ နက္ခတ်ဗေဒင်ပညာရပ်များ သင်ယူဖြစ်ခဲ့သလို၊ ပညာဒါနအလို့ငှာ ၁၀ တန်းကလေးများကို အခမဲ့ပညာသင်ကြားခြင်း၊ ဘုန်းတော်ကြီးသင် ပညာရေးကျောင်းများသို့ သွားရောက်ကူညီခြင်းများ ပြုခဲ့လေသည်။

(၆) စနေသည် ၁ နွေသို့ 89.04% ဖြင့် ရန်ပြုလျှက်ရှိသည်။ 23.4.2003 မှ 5.4.2004 ကြားတွင်ဖြစ်သည်။ ဒသာနှင့် အန္တရကြား ဆက်နွယ်မှုရှိကာ ရန်ပြုသဖြင့် အကျိုးအပြစ်ပြင်းထန်သည်။ စနေသည် ၃ တန့်သခင်ဖြစ်၍ ညီကိုမောင်နှမသဘာ ပတ်ဝန်းကျင်သဘော သက်ရောက်ကာ ၁ နွေသည် အမြော်အမြင် ကျက်သရေဖြစ်သည်။ ထိုနှစ်ခုတို့ရန်ပြုဆက်သွယ်ကြသဖြင့် ဇာတာရှင်သည် ညီကိုမောင်နှမကြောင့် စိတ်ပင်ပမ်းရမည့်အခြေအနေဖြစ်သည်။ စနေသည် ၂ တန့်အိမ်ရှင်လည်းဖြစ်သဖြင့် အဆင့်လွန်ပညာနှင့် စုဆောင်းထားသော ဥစ္စာဟူသည့် သဘောတို့လည်း ထိခိုက်သည်။ ပရိယာယ်များကို ဤပို့စ်နှင့် MOTAA သင်ခန်းစာများတွင် ဖတ်နိုင်ပါသည်။

မှတ်ချက်။ ။ ထိုကာလတွင် ဇာတာရှင်၏ ညီဖြစ်သူသည် ၁၀ တန်းစာမေးပွဲအတွင်းမှာပင် မိန်းမခိုးပြေးခြင်း၊ စီစဉ်ထားသော ညီဖြစ်သူ၏ မင်္ဂလာပွဲပျက်ခြင်း၊ မိသားစုတွင်း တရားတဘောင်ရင်ဆိုင်ရခြင်းများ ပေါ်ပေါက်ခဲ့သည်။ မိသားစုတွင်း ငွေကုန်ကျကာ၊ ဇာတာရှင်သည် မဟာတန်းဆက်မတက်ဖြစ်ရန် ဆုံးဖြတ်ခဲ့ရလေသည်။

(၇) ၄ဟူးမှ ၁ နွေသို့ 45.62% အားဖြင့် မိတ်အဖြစ် ဆက်သွယ်နေသည်။ 5.4.2004 မှ 11.2.2005 အတွင်းသက်ရောက်သည်။ အလယ်အလတ်အားဖြစ်ကာ ၁ နှင့် ၄ ပူးသော သူရိယဗုဒ္ဓယုဂ်ဖြစ်ထွန်းသည်။ ၄င်းသည် ဥာဏ်ပညာပြောင်မြောက်ခြင်း၊ ကျော်ဇောခြင်းကို ပြဆိုသည်။ ဘ၀တွင် အမှတ်ရလောက်အောင် အလုပ်တစ်ခု လုပ်ဖြစ်သည်ဟုလည်း အချို့ဆရာများ ယူဆကြသည်။ ၄ ဟူးသည် ၁၀ တန့်သခင်ဖြစ်ကာ ၁ နွေသည် ၉ တန့်သခင်ဖြစ်သည်။ ၉ တန့်သခင်နှင့် ၁၀ တန့်သခင် ဆက်သွယ်ခြင်းသည် ဓမ္မဓိပတိယုဂ်ဟုခေါ်ဆိုတာ တင့်တယ်သောအလုပ်၊ မင်းနှင့်တူသောဥစ္စာစသည်ဖြင့်ညွှန်းကြသည်။ သို့သော် အားအရ 45.62% သာ ရှိသဖြင့် ပြောင်မြောက်လှသော အကျိုးပေးကို မပေးနိုင်ခြေ။ ဆရာနျူမာန်သည် 60 % အောက်အားများကို ထည့်သွင်းမတွက်ချက်ပေ။ ထို့ကြောင့် အဆိုးမရှိယုံမှ ကောင်းသောကာလ။ ၉ တန့်သဘောအရ မြင့်မြတ်ကာ ၁၀ တန့်သဘောအရ အလုပ်ရမည့် လုပ်ဖြစ်သော ကာလဟု ဖေါ်ထုတ်နိုင်သည်။

မှတ်ချက်။ ။ ထိုကာလအတွင်းတွင် ဇာတာရှင်သည် လက်ထောက်ကထိက ရာထူးကို ရရှိကာ နည်းပညာတက္ကသိုလ်ဆရာ ဖြစ်လာခဲ့သည်။ လစာနည်းပါးသည့်ကာလဖြစ်ခြင်းကြောင့် အဆင်ပြေမှုနည်းသည်။ ဂုဏ်သိက္ခာအရ တင့်တယ်ခဲ့သည်။

(၈) ၉ကိတ်သည် ၁ နွေကို 0.00% ဖြင့် ရန်ပြုသည်။ 11.2.2005 မှ 17.6.2005 တွင်ဖြစ်သည်။ အား % မရှိသဖြင့် ပြင်းထန်သော ကောင်းဆိုးများမဖြစ်နိုင်ပါ။ % များပါက ၉ကိတ်သည် ဧကန်ပင် အပြောင်းအလဲများ ဖြစ်စေမည့်သဘောဖြစ်သည်။ ၉ ကိတ်သဘောအရ အရှုပ်ကြားမှ အပြင်ရုန်းထွက်ခြင်း၊ တည်ဆောက်မှု သဘာဝအရ တစ်စုံတစ်ခုအတွက် အားယူခြင်းများသာ ပြုလုပ်ဖြစ်မည်။ အကျိုးသက်ရောက်မှု အား % မရှိပေ။ ၁ နွေနှင့်ဆက်စပ်သော အကျိုးပေးများ ဖြစ်ပေါ်နိုင်ပါမည်။

မှတ်ချက်။ ။ ထိုကာလတွင် ထူးခြားသော အဖြစ်များမပေါ်ပေါက်ခဲ့ပါ။

(၉) ၆ကြာမှ ၁နွေသို့ 0.00% ဖြင့် ရန်ပြုသည်။ 17.6.2005 မှ 17.6.2006 အတွင်းတွင်ဖြစ်သည်။ ဒသာနှင့် အန္တရဒသာတို့ မဆက်စပ်သဖြင့် အန္တရဒသာဖြစ်သော ၆ ကြာအရ စစ်ဆေးရမည်ဖြစ်သည်။ ၆ ကြာသည် ၁၁ တန့်သခင်နှင့် ၆ တန့်အိမ်ရှင်တို့ဖြစ်သည်။ ၁၂ တန့်ရပ်သည်။ ၁၂ တန့်တွင် ၁၁ တန့်သခင်ရပ်ခြင်းသည် အတန့်ဆိုးတွင် အတန့်ကောင်းသခင် လာရပ်ခြင်းဖြစ်သည်။ အတန့်ဆိုးတွင် အားရ၍ အတန့်ကောင်းတွင် ယုတ်လျော့သော သဘောရှိသည်။ ထို့ကြောင့် ၁၂ တန့်သဘာဝ အားကောင်းကာ ၁၁ တန့်သဘာဝ အားနည်းသွားသည်။ စိတ်ပိုင်းဆိုင်ရာ အတွင်းရန်များငြိမ်းကာ၊ မိတ်ဆွေများ လာဘ်လာဘ ၀င်ငွေများနှင့် ပတ်သတ်၍ အဆိုးကြုံရမည်ဖြစ်သည်။ ၁၂ တန့်ရပ် သောမ ဂြိုဟ်အရ ရပ်ဝေးတွင် ရောက်ရှိနေနိုင်မည့် သဘောဖြစ်သည်။ ၁၂ တန့်ကောင်းကျိုးအရ အဝေးဒေသတွင် အဆင်ပြေမည့်လက္ခဏာရှိသည်။

မှတ်ချက်။ ။ အဆိုပါကာလတွင် ဇာတာရှင်သည် ဘာသာရေး ပညာရေး လုပ်ငန်းများလုပ်ဖြစ်ကာ၊ ငွေရေးကြေးရေးမပြေလည်ခဲ့ပေ။ လစာတိုးသော်လည်း လစာများသုံးစွဲ ကုန်ကျခြင်းများ၊ ညီကိုမောင်နှမများကို ကျောင်းထားခြင်းများ၊ မွေးရပ်မှသွေခွာနေရခြင်းများ ဖြစ်ပေါ်ခဲ့သည်။

ထိုကာလများအတွင်းမှ ကောဇာ စစ်ဆေးပုံများကို ဆက်လက်တင်ပြပေးပါမည်။ မေးမြန်းသမျှ စိတ်ရှည်လက်ရှည် ဖြေကြားပေးသော ဆရာနျူမာန်အား အထူးကျေးဇူးတင်ရှိပါသည်။

နက္ခတ်ဗေဒင်ပညာသည် လောကအကျိုး သည်ပိုးနိုင်ပါစေသတည်း။
ကိုပခန်း
25.11.2010

No comments:

Post a comment

ဒီpostနဲ့ပတ်သတ်လို့ ပြောချင်တာရှိရင် ပြောခဲ့ဖို့ပါဗျာ။