ဤ blog ရေးရသည့်အကြောင်းအရင်း

ကျွန်တော် မန္တလေးနည်းပညာတက္ကသိုယ် ပထမနှစ်တက်စဉ်က ထွန်းဦးစာပေကနေ နက္ခတ်ဗေဒင်စာအုပ်တစ်အုပ်ဝယ်လာပါတယ်။ အဲဒီစာအုပ်ထဲမှာ ဟောကွက်တိုင်းလိုလိုကို "၄င်းဂြိုလ်ဒသာမှာ ပြစ်ပွါးမည်" ဆိုတဲ့ အရေးအသားမျိုးတွေကိုတွေ့ရတယ်။ တော်တော်လေး သဘောကျသွားပါတယ်။

ဥပမာလူတစ်ယောက်ချမ်းသာဖို့ကံပါတယ်ဆိုတဲ့ အဟောဟာ ကာလအတိုင်းအတာ တစ်ခုအတွင်းမှာပဲ ဆိုလိုမှာပေါ့။ တစ်ဘ၀လုံးဆိုတာ ဘယ်ဖြစ်နှိုင်ပါ့မလဲနော်။ ဒါနဲ့ပဲ ဒသာဆိုတဲ့ ဝေါဟာရကို လိုက်ရှာမယ်စိတ်ကူးလိုက်ပါတယ်။

ဗေဒင်အကြောင်းဆိုတော့ ဗေဒင်ဆရာဆီသွားပါတယ်။ မန္တလေးမဟာမြတ်မုနိဘုရား အနောက်ဘက်စောင်းတန်းက ဆရာ--ဆီကို ၀င်ပါတယ်။ ကျွန်တော်ဗေဒင်အကြောင်းမေးလို့ရလားလို့ ရိုရိုသေသေမေးပါတယ်။ သူက အင်းအဲမလုပ်ပါဘူး။

ကျွန်တော် ဒသာဆိုတဲ့ ဝေါဟာရအကြောင်းသိချင်ပါတယ်။ ရှင်းပြပါလားဆရာ။ စာအုပ်လေးဘာလေးရှိရင် လမ်းညွှန်ပါလို့ တောင်းဆိုပါတယ်။ အဲဒီဆရာ ပြန်ပြောတာက ဒါက နက္ခတ်ပညာ၊ မျိုးရိုးမရှိရင် မသင်ပါဘူး။ ဆရာတပည့်ရင်းတွေမှ သင်ပေးပါတယ်တဲ့။

ဒါနဲ့ပဲ ကျွန်တော် အသာလေး ခပ်ကုပ်ကုပ်ပြန်လာခဲ့ရတယ်။ အပြန်လမ်းမှာ ပညာဆိုတာနဲ့ပတ်သတ်ပြီး အတွေးနယ်ချဲ့လာခဲ့တယ်။ ပညာရပ်တစ်ခုကို မဖြန့်ဝေရင် ဆက်လက်ထွန်းကားမှာလည်း မဟုတ်ဘူး။ တိုးတက်လာမှာလည်းမဟုတ်ဘူး။ နောက်ထပ်ထပ်ဆင့်စဉ်းစားမိတာက ဒီပညာတွေကရော လျှို့ဝှက်ရလောက်အောင် အဖိုးတန်သလားလို့ သံသယ၀င်မိတယ်။

အပြန်လမ်းမှာ ထွန်းဦးစာပေကို ပြန်ဝင်ပါတယ်။ စာအုပ်တွေမွှေပါတယ်။ ကျွန်တော့်အတွက် အမှတ်တရဖြစ်စေမယ့် ဆရာမောက်ရဲ့ စာအုပ်တစ်အုပ်ရပါတယ်။ စာအုပ်ထဲမှာ မဟာဘုတ်ကိုပဲ ကာလတွေအလီလီစိတ်ပြီး ဟောထားတာကို တွေ့ရပါတယ်။ ဘယ်လိုတွက်ရတယ်ဆိုတာမသိဖြစ်နေလို့ ဗလာစာအုပ်မှာ ကာလဇယားတွေကူးပြီး နေ့ညစာအုပ်အချိန်တွေ အကုန်ခံပြီး စဉ်းစားခဲ့ပါတယ်။

ကျောင်းစာအုပ်တိုင်းမှာ နှစ်လရက်တွေနဲ့ပြည့်တဲ့အထိပါဘဲ။ အချိုးနဲ့တွက်ရတယ်လို့ ကျွန်တော်တွေ့ရှိတဲ့ အခါမှာတော့ calculator တစ်လုံးရှိရင် စိတ်ကြိုက်ခွဲနိုင်လာပါတယ်။

ဒါပေမယ့် ဒီမဟာဘုတ်ဟောကိန်းတွေဟာ နှစ်တူတဲ့ နေ့သားတူတဲ့သူအသီးသီးအတွက် အတူတူဖြစ်နေပါသေးတယ်။ ဥပမာ ၁၃၄၅ ခုနှစ်အတွင်းမွေးတဲ့ အင်္ဂါသားများဟာ ဘယ်လိုပဲ ကာလတွေစိတ်ဟောဟော အဖြေကတူနေပါတယ်။ ကျွန်တော် ဘ၀င်မကျခဲ့ပါ။

နောက်တော့ ဆရာမောက်ရဲ့ ဇာတာဖွဲ့နည်းစာအုပ်ကို ရခဲ့ပါတယ်။ ဒီခါမှာတော့ကျွန်တော်ဟာ သံဒိဌပြက္ခဒိန်တွေနဲ့ ဇာတာဖွဲ့တတ်ခဲ့ပါတယ်။ ဇာတာတစ်ဆောင်ကို ဖွဲ့တတ်တဲ့ အခါမှာ ၁၃ မိနစ်ခွဲအချိန်လောက်ကွာခြားမွေးရင်တောင် ဇာတာကကွဲပြားတာကို သိလာပါတယ်။ အဲဒီကစလို့ ဇာတာတွေနဲ့ကျွန်တော် လုံးထွေးနေခဲ့တာပါပဲ။

မန္တလေးက နက်ဆိုင်တစ်ဆိုင်သွားရင်းက ဆိုင်မှာ ကပ်ထားတဲ့ "ကွန်ပျူတာဖြင့်ဇာတာဖွဲ့ပေးသည် တစ်စောင် ၅၀၀ ။" ဆိုတာတွေ့တော့ တော်တော်လေးစိတ်ဝင်စားခဲ့ပါတယ်။ ကျွန်တော် တကုပ်ကုပ်တွက်ရတာကို ကွန်ပျူတာနဲ့တောင်ဖွဲ့လို့ရသတဲ့ဆိုတော့ စိတ်မ၀င်စားဘဲနေနိုင်ပါ့မလားဗျာ။

ဒီလိုနဲ့ပဲ လတွေအတော်ကြာမှ ကျွန်တော့်လက်ထဲ program လေးရောက်လာပါတယ်။ ဒါပေမယ့် အခက်အခဲတွေများလွန်းတာကြောင့် calculator နဲ့ပဲ နှစ်ပါးသွားရပါတယ်။

ခုချိန်မှာတော့ အွန်လိုင်းကို အမြဲတမ်းလိုလိုရောက်နေနိုင်တာရယ်၊ အထောက်အကူပြု software တွေရှိနေတာရယ်၊ အရင်က ကျွန်တော်ဖြစ်ခဲ့သလို ပညာငတ်တဲ့အဖြစ်မျိုး ၀ါသနာရှင်တွေ မဖြစ်စေလိုတာရယ်ကြောင့် လေ့လာဖူးသမျှကို အွန်လိုင်းကနေ လက်ဆင့်ကမ်းလိုခဲ့ပါတယ်။

'မြန်မာ့နည်းပညာ' blog ကိုရေးသူ မေဂျာတူငယ်သူငယ်ချင်း ကိုဇေရဲ့ ကျေးဇူးနဲ့ blogဆိုတာကို စသိပါတယ်။ 'ထာဝရ' blog ကိုရေးသူ တစ်ရွာတည်းသား သူငယ်ချင်းရဲ့ အကူအညီ၊ စိတ်ရှည်လက်ရှည်ရှင်းပြတဲ့ ကိုပီကေ၊ ရေးသမျှကို အမြဲတမ်းအားပေးနေတဲ့ (မြေးလေး)ရွှေမင်းသမီးလေးတို့ကြောင့် ဒီblog ကိုဖန်တီးပြီး ဆက်လက် အသက်သွင်းနေပါဦးမယ်ခင်ဗျာ။

စာအုပ်တွေဖတ်ပြီးသာလေ့လာခဲ့ရပါတယ်။ အနီးကပ်သင်ပေးသူဆရာမရှိခဲ့တာရယ် ဗေဒင်နဲ့ အသက်မွေးခဲ့သူမဟုတ်တာရယ်ကြောင့် ကိုယ့်ကိုကိုယ်ဗေဒင်တတ်ပြီလို့မခံယူဝံ့သေးပါခင်ဗျာ။ လေ့လာဆဲသက်သက်တာဖြစ်ပါတယ်။ ဗေဒင်ကျမ်းတွေကို စမြင်ဖူးတာ ၈ နှစ်တောင်မပြည့်သေးပါခင်ဗျာ။

အမှားပါကခွင့်လွှတ်စေချင်ပါတယ်။ အမှန်ပြင်ပေးမယ့်သူကို ထာဝရကြိုဆိုလျှက်ပါခင်ဗျာ။